MESA REDONDA DE MULLERES CIENTÍFICAS
O 11 de febreiro celébrase o día internacional da muller e a nena na ciencia e para conmemorar este día na UNED de Lugo fíxemos un programa especial de radio coa colaboración de Sara Meijide, presentadora do programa "Hoy por hoy" na cadena SER de Lugo onde diversas mulleres científicas destacadas compartiron as súas experiencias e traxectorias, destacando o papel crucial das mulleres no ámbito científico. Este proxecto alíñase cos esforzos globais para pechar a brecha de xénero na investigación e a innovación. Dito programa foi emitido o 9 de febreiro en vivo e posteriormente o propio 11 de febreiro, esta vez na cadena SER xeral.
A continuación pode escoitarse dito programa:
RELATORAS
ANA TRASEIRA
Ana é Enxeñeira Técnica Industrial e Enxeñeira Química pola Universidade de Santiago de Compostela. Ademais é directora do centro asociado da UNED de Lugo e codirectora do proxecto #LugoNaturalMente. Actualmente é titora da materia “Cambio Climático” no grao de Ciencias Ambientais da UNED.
ESTELA PROL
Ronsel é Enxeñeira Química pola Universidade de Santiago de Compostela e traballa como directora de proxectos na Axencia Espacial Europea (ESA), concretamente na Oficina de Política Industrial e Analítica de Datos.
PAULA FERNÁNDEZ
Paula é Bióloga pola Universidade da Coruña, especializada na Conservación da Biodiversidade Terrestre pola Universidade de Santiago de Compostela. Actualmente traballa como bióloga ambiental na UNED de Lugo, desenvolvendo actividades de divulgación ambiental enmarcadas dentro do proxecto #LugoNaturalMente.
MARÍA ISABEL FERNÁNDEZ
María Isabel é catedrática de Química Inorgánica da Universidade de Santiago de Compostela na Facultade de Ciencias de Lugo. Forma parte do equipo Ciencia NOSA, grupo de innovación docente en didáctica e de divulgación científica e a inclusión da perspectiva de xénero na docencia.
